Liverpool sagt í viðræðum við Milan vegna Carroll

Ekki er útilokað að sóknarmaðurinn Andy Carroll verði lánaður til ítalska félagsins AC Milan áður en lokað verður fyrir félagaskipti í Evrópu á föstudaginn næstkomandi.

Carroll hefur verið orðaður við AC Milan í sumar og greina ítalskir fjölmiðlar frá því í kvöld að viðræður á milli félaganna um lánssamning til loka leiktíðarinnar séu langt komnar.

Liverpool er sagt vilja fá 2,4 milljónir punda fyrir að lána Carroll til Ítalíu en AC Milan er sagt reiðubúið að greiða helming þeirrar upphæðar.

AC Milan er enn að leita að eftirmanni Zlatan Ibrahimovic sem fór til PSG í Frakklandi í sumar. Carroll var einnig orðaður við West Ham og Newcastle í sumar en ekkert varð af því. Hann var keyptur til Liverpool frá Newcastle fyrir 35 milljónir punda í janúar í fyrra.