Ferguson: Best fyrir Morrison að flytja frá Manchester

Táningurinn Ravel Morrison gekk í gær raðir West Ham fyrir eina milljón punda en forráðamenn Manchester United voru þar með greinilega búnir að gefast upp á honum.

Morrison er átján ára og þykir ótrúlega efnilegur leikmaður. Innan vallar lofar hann mjög góðu og var hann sagður vera einn sá albesti leikmaður sem unglingaakademía United hefur alið af sér síðan að Paul Scholes gekk inn í aðallið United á sínum tíma.

En ástæðan fyrir því að hann mun ekki klæðast búningi Manchester United aftur (í bili að minnsta kosti) eru vandræði hans utan vallar. Ferguson hafði ekki mörg orð um hann að segja um hann í gærkvöldi en sagði þó þetta:

„Það er búið að segja sögu hans með nokkuð ítarlegum hætti. Í fullri hreinskilni tel ég það betra fyrir hann að komast í burtu frá Manchester. Hann býr yfir miklum hæfileikum en það er mjög mikilvægt að það sé tekið rétt á hans málum."

Fréttavefurinn Goal.com er með ítarlega umfjöllun um félagaskiptin og Morrison sjálfan sem má lesa hér. Þar er gefið í skyn að Morrison hafi einfaldlega brennt allar brýr að baki sér hjá United.

Steininn tók úr þegar að þolinmæði Ferguson var á þrotum. Allir aðrir hjá félaginu voru löngu búnir að fá sig fullsadda á hegðun hans og uppátækjum. Alvarlegast er þegar hann var á árslöngu skilorði fyrir að ógna vitni í sakamáli.

Stærsta vandamálið er þó talið vera að hann hefur verið í slæmum félagsskap í Manchester. Hann hafi verið með marga vini í kringum sig sem hafi fest sig á hann eins og blóðsugur. Ferguson taldi greinilega nauðsynlegt að losa hann úr því umhverfi og fá hann til að einbeita sér að fótbolta.

West Ham er í austurhluta Lundúna sem er ekki besta hverfi Bretlands. En talið er að Morrison muni búa í friðsælu úthverfi þar sem hann verði undir verndarvæng Sam Allardyce, stjóra West Ham og góðvinar Ferguson. Það er nú undir honum komið að ná því besta fram úr Morrison og verður forvitnilegt að fylgjast með hans framgangi næstu vikurnar og mánuði.