Jol: Dempsey ákveðinn í að yfirgefa Fulham

Bandaríski framherjinn Clint Dempsey er ákveðinn í að yfirgefa herbúðir Fulham. Þetta segir Martin Jol, knattspyrnustjóri félagsins.

Dempsey skoraði sautján mörk í ensku úrvalsdeildinni á síðustu leiktíð en vill komast að hjá félagi sem spilar í Meistaradeild Evrópu.

„Clint Dempsey vill fara. Hann vill ekki framlengja hjá félaginu og þó við viljum endilega halda honum er það ómögulegt gegn vilja hans," sagði Jol á blaðamannafundi í gær.

Fulham mætir Norwich í fyrstu umferð ensku úrvalsdeildarinnar í dag en Bandaríkjamaðurinn er ekki í leikmannahóp Lundúnarliðsins.

„Hann sagði mér að hann vildi komast til liðs í Meistaradeildinni. Hann sagði mér það á síðasta ári, síðasta sumar og svo einu sinni enn," sagði Jol.

Hollenski stjórinn segir þó augljóst mál að Dempsey fari ekki frá félaginu ódýrt en samningur Dempsey rennur út næsta sumar.