Laudrup: Joe Allen verður Liverpool mjög mjög dýr

Michael Laudrup, stjóri Swansea City, hefur sent áhugasömum, aðallega Brendan Rodgers, stjóra Liverpool, skýr skilaboð um að miðjumaðurinn Joe Allen fari á engu útsöluverði ætli félög að kaupa hann af velska félaginu. Liverpool hefur boðið Swansea 20 milljónir fyrir hann en það er hvergi nærri nóg að mati Danans.

„Hann er mjög mikils virði því hann er góður leikmaður. Stjórinn þekkir hann og ef hann ætlar að breyta leikstíl Liverpool þá þarf hann miðjumann eins og Joe Allen," sagði Michael Laudrup við Sky Sports.

„Hann veit líka að leikmaðurinn verður mjög mjög dýr. Við höfum séð Liverpool kaupa marga miðjumenn undanfarið ár sem hafa kostað félagið mikla peninga. Með fullri virðingu fyrir þeim þá er Joe á stalli ofar en þeir," sagði Laudrup.

„Ef einn að þeim er 17 milljóna punda virði þá á Joe að kosta meira en 20 milljónir," sagði Laudrup en Daninn vill ekki heldur leikmenn í kaupbæti sem ekki eru að spila með Liverpool. Liverpool bauð Swansea Jonjo Shelvey.

„Ég sé ekki leikmann sem kemst ekki í byrjunarlið Liverpool komast í byrjunarlið okkar. Ef við gætum fengið (Luis) Suarez þá værum við að tala saman," sagði Laudrup í meira gríni en alvöru.