Sprengjum rigndi á Homs

Stjórnarherinn í Sýrlandi gerði öflugar sprengjuárásir á borgina Homs í Sýrlandi í gær, þar sem harðir bardagar við uppreisnarmenn hafa staðið yfir undanfarna daga. Þetta eru hörðustu árásir stríðsins til þessa.

Árásirnar kostuðu tugi manna lífið í gær en hundruð manna hafa látist í átökunum þar í borg síðan fyrir helgi.

Bandaríkjamenn lokuðu í gær sendiráði sínu í Damaskus, höfuðborg Sýrlands, og Bretar hafa kallað sendiherra sinn heim frá Sýrlandi.

Bandaríkjamenn og fleiri ríki eru afar ósátt við að Rússar og Kínverjar hafi beitt neitunarvaldi sínu þegar ályktun gegn Sýrlandi var afgreidd í Öryggisráði Sameinuðu þjóðanna um helgina.

Sergei Lavrov, varnarmálaráðherra Rússlands, varði hins vegar afstöðu Rússa og sagði að hefði ályktunin verið samþykkt í Öryggisráðinu jafngilti það því að ráðið tæki afstöðu með annarri af tveimur stríðandi fylkingum í borgarastríði.

Hann sagði að það myndi aðeins leiða af sér meira mannfall ef „vopnaðir hópar öfgamanna“ eru hvattir áfram. - gb