Newcastle er ekki að reyna að kaupa Carroll aftur frá Liverpool

Sögusagnir um að Newcastle sé að reyna að kaupa Andy Carroll frá Liverpool eru ekki sannar samkvæmt umboðsmanni framherjans. Liverpool keypti Carroll á 35 milljónir punda frá Newcastle í janúar í fyrra en Newcastle átti samkvæmt fréttum í enskum miðlum að vera að reyna að kaupa hann til baka á 20 milljónir punda.

Andy Carroll var kominn með 11 mörk á miðju tímabili þegar Liverpool keypti hann fyrir tólf mánuðum en það hefur lítið gengið hjá honum í búningi Liverpool-liðsins. Enskir fjölmiðlar hafa heimildir fyrir því að Kenny Dalglish, stjóri Liverpool, hafi áhuga á því að kaupa Demba Ba frá Newcastle eða Darren Bent hjá Aston Villa og sé því tilbúinn í að láta hinn 23 ára gamla Carroll fara.

Andy Carroll var meðal markaskorara Liverpool í bikarsigrinum á Oldham á föstudagskvöldið og hefur þar með skorað 6 mörk í 31 leik með félaginu. Möguleikar hans á að komast í enska landsliðið á EM í sumar eru líka nánast úr sögunni enda er hann ekki að sýna mikið þegar hann fær tækifærið hjá Dalglish.