Liverpool hafði betur gegn City í Manchester

Liverpool er í sterkri stöðu eftir 1-0 sigur á Manchester City á útivelli í fyrri leik liðanna í undanúrslitum ensku deildabikarkeppninnar.

Þeir rauðklæddu skoruðu strax á þrettándu mínútu þegar að fyrirliðinn Steven Gerrard skoraði úr vítaspyrnu sem Daniel Agger krækti í.

City-menn voru mikið með boltann eftir þetta, sér í lagi í seinni hálfleik, og uppskáru nokkur færi. En án árangurs og fögnuðu leikmenn Liverpool vel í leikslok.

Þetta er í fyrsta sinn á tímabilinu sem City skoraði ekki á heimavelli sínum en liðið saknar greinilega þeirra Yaya Toure, Vincent Kompany og David Silva sem gátu ekki spilað í kvöld.

Leiknum var lýst á Vísi og má lesa lýsinguna hér fyrir neðan.

Manchester City - Liverpool 0-1

0-1 Steven Gerrard, víti (13.)

21.40 Leiknum er lokið með 1-0 sigri Liverpool. Síðari leikurinn fer fram á Anfield eftir tvær vikur.

21.37 Hætta í uppbótartíma. Samir Nasri á fyrirgjöf inn í teig og Agüero skallar að marki en yfir.

21.32 Afar lítið um færi síðustu mínúturnar. City hefur verið meira með boltann en Liverpool hefur varist vel og séð til þess að sóknarleikur City hefur ekki borið árangur - enn sem komið er. Fimm mínútur eftir.

21.05 City fékk horn og barst boltinn á hinn fílsterka Micah Richards sem skallaði að marki af stuttu færi. En beint á Reina sem varði vel.

21.03 Martin Kelly gerði skelfileg mistök í vörn Liverpool. Ætlaði að senda á Reina í markinu en Agüero komst í sendinguna og náði boltanum. Tókst þó ekki að leika á Reina sem þvingaði hann í skot yfir markið.

20.53 Síðari hálfleikur er hafinn.

20.36 Fyrri hálfleik lokið og greinilegt að City saknar þeirra Vincent Kompany og David Silva. Liverpool byrjaði leikinn af krafti og nýtur þess að vera í forystu á þessum sterka útivelli.

20.25 Roberto Mancini ákveður að gera breytingar á sínu liði. Hann ákveður að setja Samir Nasri inn á á kostnað Mario Balotelli, sem er ekki sáttur þegar hann gengur af velli.

20.10 Jay Spearing þarf að fara af velli vegna meiðsla og kemur Charlie Adam inn í hans stað.

20.00 0-1 Steven Gerrard steig á punktinn og skoraði af öryggi.

19.58 Liverpool fékk aðra hornspyrnu. Nú barst boltinn á Agger sem reyndi að komast fram hjá Savic. Svartfellingurinn braut hins vegar á honum og vítaspyrna dæmd.

19.57 Gerrard tók hornspyrnu. Boltinn barst út á Downing sem tók viðstöðulaust skot sem Hart varði með naumindum.

19.51 Andy Carroll fékk fyrsta færi leiksins. Náði að halda Savic í skefjum og skjóta að marki en Joe Hart var vel á verði.

19.45 Leikurinn er hafinn.

19.30 Velkomin í lýsingu frá leik Manchester City og Liverpool í enska deildabikarnum. Hér verður fylgst með því helsta sem gerist í leiknum.

Byrjunarliðin má sjá hér fyrir neðan en Steven Gerrard, fyrirliði, er í byrjunarliði Liverpool sem og Andy Carroll og Craig Bellamy. Hjá City eru þeir Sergio Agüero og Mario Balotelli í fremstu víglínu.

Man City: Hart; Richards, Lescott, Savic, Clichy; Milner, Johnson, Barry, De Jong; Agüero, Balotelli.

Varamenn: Pantilimon, Zabaleta, Kolarov, Onuoha, Nasri, Hargreaves og Dzeko.

Liverpool: Reina; Johnson, Agger, Kelly, Skrtel; Gerrard, Henderson, Downing, Spearing; Carroll, Bellamy.

Varamenn: Doni, Jose Enrique, Coates, Carragher, Adam, Shelvey, Kuyt.