Adam Johnson gerði fjögurra ára samning við Sunderland

Sunderland er búið að ganga frá kaupum á enska landsliðsmanninum Adam Johnson frá Englandsmeisturum Manchester City og er leikmaðurinn búinn að skrifa undir fjögurra ára samning. Kaupverðið var ekki gefið upp.

Martin O'Neill, stjóri Sunderland, hafði í nóg að snúast í dag því hann hafði áður keypt framherjann Steven Fletcher frá Úlfunum. Fletcher og Adam Johnson munu lífga upp á sóknarleik Sunderland í ensku úrvalsdeildinni í vetur.

Adam Johnson er 25 ára vængmaður sem hefur gengið illa að vinna sér sæti í stjörnuprýddu liði Manchester City síðan að félagið keypti hann frá Middlesbrough.

Adam Johnson var með 6 mörk og 6 stoðsendingar í 26 leikjum með Manchester City í ensku úrvalsdeildinni á síðasta tímabili en fékk þó aðeins að byrja inn á í tíu þessara leikja. Hann var í byrjunarliði enska landsliðsins á móti Ítalíu í vináttulandsleik á dögunum.