Giroud segist ekki vera arftaki Van Persie

Franski framherjinn Olivier Giroud er þegar farinn að finna fyrir pressunni hjá Arsenal. Honum er mikið í mun um að fólk horfi ekki á hann sem arftaka Robin van Persie þó svo hann muni reyna að fylla skarð hans eins vel og hægt er.

"Ég er ekki hér til þess að leysa Van Persíe af hólmi eða til að fá fólk til þess að gleyma honum. Ég er hér til þess að koma með eitthvað nýtt," sagði Giroud.

"Ég vil ekki segja að ég sé arftaki hans enda ber ég mikla virðingu fyrir honum þar sem hann átti ótrúlegt tímabil síðast.

"Ég er aftur á móti tilbúinn að axla ábyrgð hjá Arsenal og ætla að standa mig vel með liðinu."