Moratti: Inter búið að missa af Tevez

Massimo Moratti, forseti ítalska úrvalsdeildarfélagsins Inter, segir að félagið sé búið að missa Carlos Tevez úr greipunum en hann vilji frekar ganga til liðs við erkifjendurna í AC Milan.

Samkvæmt ítölskum fjölmiðlum mun Inter náð samkomulagi við Manchester City um kaupverð á Tevez en að hann hafi frekar áhuga á að fara til AC Milan.

„Ég held það [að hann fari til AC Milan]. Svona er fótboltinn," sagði Moratti í viðtali á heimasíðu Inter.

Þá hefur komið fram í ítölskum fjölmiðlum að Adriano Galliani, varaforseti AC Milan, væri á leið til Englands til að bjóða jafn vel og Inter í Tevez og að ganga frá félagaskiptunum áður en lokað verður þau um mánaðamótin.

Tevez hefur verið í ónáðinni hjá Roberto Mancini, stjóra City, síðan hann neitaði að koma inn á sem varamaður í leik liðsins í Meistaradeildinni í haust. Tevez hélt í leyfisleysi til Argentínu í nóvember og hefur síðan þá ekki látið sjá sig í Manchester.

Inter er sagt hafa boðið að gera lánssamning við City um Tevez með möguleika á að kaupa hann í sumar fyrir 27 milljónir evra.