Stoke fær Huddlestone lánaðan

Tottenham sér ekki fram á að hafa nein not fyrir Tom Huddlestone í vetur og því hefur félagið ákveðið að lána hann til annars félags. Stoke er líklegasti áfangastaðurinn.

Huddlestone missti af næstum öllu síðasta tímabili vegna meiðsla. Hann þurfti þá meðal annars að fara í tvær aðgerðir vegna ökklameiðsla.

Huddlestone var ekki í leikmannahópi Spurs um helgina og hefur nú fengið grænt ljós á að fara að láni svo hann geti spilað eitthvað í vetur.

Þessi 25 ára leikmaður hefur jafnað sig af meiðslunum en vantar leiktíma og þann tíma fær hann væntanlega hjá Stoke.