Markalaust á Anfield

Það var lítið um fín tilþrif í leik Liverpool og Tottenham í kvöld. Leikurinn olli miklum vonbrigðum og endaði með leiðinlegu, markalausu jafntefli.

Luis Suarez byrjaði á bekknum en hann hefur nú tekið út átta leikja bannið sem hann fékk fyrir kynþáttaníð í garð Patrice Evra, leikmanns Man. Utd. Harry Redknapp, stjóri Spurs, var síðan fjarri góðu gamni þar sem fluginu hans til Liverpool var frestað.

Fyrri hálfleikur var lítið fyrir augað og flestir fengir þegar flautað var til leikhlés. Helst bar til tíðinda í hálfleiknum að köttur hljóp inn á völlinn og þurfti að stöðva leik um tíma vegna þessa enda var kötturinn ekkert spenntur fyrir því að fara af vellinum.

Fátt var um færi framan af síðari hálfleik. Þegar 25 mínútur voru eftir af venjulegum leiktíma kom Luis Suarez loks af bekknum. Hans fyrsti leikur fyrir Liverpool síðan á annan dag jóla.

Suarez var aðeins fimm mínútur að næla sér í gult spjald. Hann sparkaði þá fast í maga Scott Parker er hann ætlaði að sparka í boltann. Óvart sögðu flestir en margir vildu þó hreinlega fá rautt á Suarez enda leit þetta afar illa út.

Sex mínútum fyrir leikslok fékk Gareth Bale besta færi leiksins. Rangstöðugildra Liverpool brást og Bale komst einn gegn Pepe Reina. Bale ætlaði að setja hann milli fóta Reina en Spánverjinn sá við honum. Illa farið með gott færi hjá Bale.

Leikurinn opnaðist loksins þarna því mínútu síðar fékk Suarez dauðafæri. Skalla rétt fyrir utan markteig en hann stangaði knöttinn beint í fangið á Brad Friedel. Meira gerðist ekki í þessum slappa og hundleiðinlega leik.

Staðan í ensku úrvalsdeildinni.