Van Persie sleppur við kæru

Robin van Persie, framherji Arsenal, er ekki á leiðinni í leikbann eftir olnbogaskot sitt í bikarleiknum á móti Aston Villa um helgina. Aganefnd enska knattspyrnusambandsins mun ekki taka málið upp.

Van Persie virtist gefa Carlos Cuellar vænt olnbogaskot á 64. mínútu leiksins þegar þeir fóru upp í skallaeinvígi. Þremur mínútum áður hafði Hollendingurinn skoraði þriðja mark Arsenal og sitt annað en það mark reyndist síðan vera sigurmarkið í leiknum.

Michael Jones, dómari leiksins, tók það fram í skýrslu sinni um leikinn að hann hafi séð atvikið og taldi það ekki vera refsivert. Aganefnd enska sambandsins getur þar af leiðandi ekki tekið atvikið fyrir.

Alex McLeish, stjóri Aston Villa, heimtaði það eftir leikinn að aganefndin tæki olnboga Robin van Persie inn á sitt borð en honum varð ekki að ósk sinni.

Þetta eru hinsvegar mjög góðar fréttir fyrir Arsenal enda er Robin van Persie búinn að skora 25 mörk í 29 leikjum í öllum keppnum á þessu tímabili.