Hughes: QPR gæti hjálpað City fengi liðið Tevez á láni

Mark Hughes, stjóri Heiðars Helgusonar hjá Queens Park Rangers, er viss um að það kæmi sér vel fyrir Manchester City að lána Argentínumanninn Carlos Tevez til annars liðs í ensku úrvalsdeildinni. QPR hefur eins og mörg önnur félög áhuga á því að fá Tevez á láni þar sem að það lítur út fyrir að City nái ekki að selja leikmanninn áður en félagsskiptaglugginn lokar í kvöld.

„Það er hægt að benda á það hvernig þetta hefur verið með Adebayor hjá Spurs. Ef Tevez fengi að koma til okkar þá myndi hann hjálpa QPR á móti öðrum höfuðandstæðum City í toppbaráttunni og um leið aðstoða Man City við að vinna deildina. Það hlýtur að vera það eina sem skiptir þá máli því peningar eru ekkert vandamál hjá þeim," sagði Mark Hughes við Guardian.

„Ég hef ítrekað velt fyrir mér möguleikanum á því að fá Tevez á láni en það eru ekki miklar líkur á að því verði ef ég segi alveg eins og er. Hann er og verður Man City leikmaður á næstunni. Tevez mun klára tímabilið hjá City og skoða síðan möguleika sína í sumar. Ég held samt að við komum þá aldrei til greina," sagði Hughes.