Agger heimtar þrjú stig á móti Úlfunum í kvöld

Liverpool hefur enn ekki unnið deildarleik á árinu 2012 þrátt fyrir frábæran mánuð í bikarkeppnunum þar sem liðið sló Manchester City út úr enska deildabikarnum og Manchester United út úr enska bikarnum.

Danski miðvörðurinn Daniel Agger er að sjálfsögðu ekki sáttur með aðeins eitt stig í þremur deildarleikjum á árinu 2012 og heimtaði þrjú stig í kvöld í viðtali á heimasíðu Liverpool. Liverpool heimsækir þá Eggert Gunnþór Jónsson og félaga í Wolves.

„Við viljum vera hærra í töflunni og þetta er ekki búið að vera nógu gott. Við verðum að ná í þessi þrjú stig í kvöld," sagði Daniel Agger. Liverpool er sem stendur í sjöunda sæti deildarinnar með 35 stig í 22 leikjum.

„Þetta verður erfiður leikur en við munum spila til sigurs," sagði Agger. Wolves er í næstneðsta sæti deildarinnar en það hefur oft gengið illa hjá Liverpool í vetur að landa þremur stigum á móti neðstu liðunum.