AC Milan að reyna að næla í Tevez á síðustu klukkutímunum

Framtíð Carlos Tevez gæti ráðist áður en félagsskiptaglugginn lokar í kvöld því nýjustu fréttirnar frá Ítalíu benda til þess að AC Milan ætlar að gera eina lokatilraun að næla í argentínska framherjann á síðustu klukkutímunum.

AC Milan, Paris St Germain og Inter Milan hafa öll gefist upp á viðræðum við Manchester City enda vill enska liðið fá sitt fyrir leikmanninn sem hefur ekki spilað fyrir liðið síðan í september.

AC Milan og Manchester City eru farin að tala saman á ný en ekki er vitað hvort að City-menn séu jafnvel orðir opnari fyrir því að lána Tevez fram á vorið. Það gæti einnig verið samningur í burðarliðnum þar sem Tevez fari á láni fram á sumar og í framhaldinu myndi AC Milan síðan ganga frá kaupum á honum.

Skysports segir frá þessu sem og því að rússneska félagið Anzhi Makhachkala hafi einnig áhuga á því að tryggja sér þjónustu Tevez áður en glugginn lokar á miðnætti.