Zamora vill fá alltof há laun hjá QPR

Fulham er búið að samþykkja tilboð Queens Park Rangers í framherjann Bobby Zamora en það gengur ekki eins vel hjá Queens Park Rangers að ná samningum við leikmanninn sjálfan ef marka má frétt á Guardian. Zamora lék undir stjórn Mark Hughes, stjóra QPR, í fyrra.

Queens Park Rangers ætlar að borga Fulham sjö milljónir punda fyrir leikmanninn en sú upphæð gæti hækkað upp í níu milljónir punda ef Zamora nær tilteknum leikjafjölda og að hjálpa Queens Park Rangers að halda sæti sínu í ensku úrvalsdeildinni.

Heimildarmaður Guardian segir að Bobby Zamora vilji tvöfalda launin sín fari hann til QPR en hann er að fá 45 þúsund pund í vikulaun sem gera tæplega 8,8 milljónir íslenskra króna. Zamora vill fá 90 þúsund pund eða 17,5 milljónir á viku hjá QPR.

Bobby Zamora skrifaði undir fjögurra ára samning við Fulham þegar Mark Hughes var enn stjóri félagsins en Zamora hefur ekki átt upp á pallborið hjá Martin Jol, núverandi stjóri Fulham.