Nítján ára þýskur miðjumaður til Arsenal

Arsenal hefur tilkynnt að félagið hafi fest kaup á Thomas Eisfeld, nítján ára sóknarþenkjandi miðjumanni sem er uppalinn hjá þýska úrvalsdeildarfélaginu Borussia Dortmund.

Enska félagið hefur fylgst lengi með kappanum sem hefur þótt spila vel með bæði yngri liðum Dortmund og yngri landsliðum Þýskalands. Hann fetar nú í fótspor Tomas Rosicky og Jens Lehmann sem komu báðir frá Dortmund til Arsenal á sínum tíma.

Eisfeld hefur ekki náð að spila með aðalliði Dortmund en hann varð fyrir alvarlegum meiðslum þegar hann sleit krossband í hné árið 2009. Kaupverðið er sagt nema um hálfri milljón punda.

Fyrr í dag greindi Arsenal frá því að Japaninn Ryo Miyachi hafi verið lánaður til Bolton og muni spila með liðinu til loka tímabilsins.