Ætlar Brendan Rodgers að gera vinstri bakvörð úr Downing?

Brendan Rodgers, nýr stjóri Liverpool, er tilbúinn að reyna nýja hluti til þess að ná eitthvað út úr enska landsliðsmanninum Stewart Downing sem fann sig engan veginn á sínu fyrsta tímabili á Anfield. Downing lék sem vinstri bakvörður í Evrópusigrinum á Hearts í síðustu viku og fékk hrós að launum frá Rodgers.

Kenny Dalglish borgaði Aston Villa 20 milljónir punda fyrir Downing í fyrrasumar og hann var keyptur sem sóknarvængmaður. Downing náði hinsvegar ekki að skora og gaf bara tvær stoðsendingar í 36 leikjum í ensku úrvalsdeildinni á síðustu leiktíð.

Stewart Downing hefur þrátt fyrir allt átt fast sæti í enska landsliðshópnum en það breytir ekki því að þessi 28 ára gamli leikmaður þarf að "læra" nýja stöðu ætli hann að komast í liðið hjá Brendan Rodgers.

„Það er stór möguleiki að hann spili sem vinstri bakvörður. Nútíma bakverðir eins og [Jordi] Alba og [Ashley] Cole eru mjög sókndjarfir. Downing spilaði þessa stöðu með Middlesbrough á sínum tíma þegar liðið komst í úrslitaleik UEFA-bikarsins og þetta gæti létt af pressunni á honum," sagði Brendan Rodgers.

José Enrique er fyrsti kostur í stöðu vinstri bakvarðar en Rodgers hefur trú á því að Stewart Downing geti leyst þessa stöðu vel. „Ég er í engum vafa um að hann sé nógu góður til þess en spurning er bara hvort að hann nái upp stöðugleika. Ég er ekki stjóri sem gefst upp á mínum leikmönnum og ég leita frekar að nýjum leiðum til að nota þá. Stewart á framtíð sem sóknarmaður en ég hef líka rætt hinn möguleikann við hann og hann er spenntur. Það skiptir mestu máli," sagði Brendan Rodgers.