Berbatov nú á leið til Fulham

Dimitar Berbatov hefur hafnað bæði Fiorentina og Juventus og er nú helst orðaður við Fulham. Forráðamenn Fiorentina eru afar óánægðir með framkomu Berbatov.

Fiorentina hafði komist að samkomulagi við Manchester United um kaup á Berbatov og var búið að greiða fyrstu greiðsluna fyrir hann, ef marka má yfirlýsingu sem félagið birti í kvöld.

Þar segir að þetta hafi verið gert eftir að félagið gerði munnlegt samkomulag við Berbatov. Það hafi útvegað honum og umboðsmanni hans flugmiða til Flórens á Ítalíu en þangað hefðu þeir aldrei skilað sér.

„Við erum nú ánægðir með að leikmaðurinn kom ekki til okkar. Hann á ekki skilið að búa í borginni okkar og klæðast treyju okkar," sagði í harðorðri yfirlýsingu Fiorentina.

Juventus hafði einnig áhuga á Berbatov en Beppe Marotta, yfirmaður íþróttamála félagsins, sagði að Berbatov vilji vera áfram í Englandi af fjölskylduástæðum.

Martin Jol, stjóri Fulham, þekkir vel til Berbatov enda störfuðu þeir saman hjá Tottenham á sínum tíma.