Rooney segir fréttaflutninginn þvætting

Wayne Rooney sagði á Twitter-síðu sinni í dag að það væri ekkert hæft í þeirri umfjöllun enskra fjölmiðla sem segja hann á leið frá Manchester United.

Rooney er nú frá vegna meiðsla sem hann varð fyrir um síðustu helgi en enskir fjölmiðlar hafa verið duglegir að fjalla um hans mál síðustu daga og segja samband hans og Alex Ferguson, stjóra United, afar stirt.

Ferguson hefur þegar sagt að Rooney sé mikilvægur þáttur í hans framtíðarplönum með lið United og Rooney bætti svo um betur á Twitter-síðu sinni.

„Las þetta bull í blöðunum og hef heyrt hvað fólk hefur sagt. Þetta er algjör þvættingur," skrifaði hann.