Guidetti eftirsóttur þrátt fyrir veikindi

John Guidetti er eftirsóttur víða um Evrópu þrátt fyrir slæm veikindi sem bundu næstum enda á knattspyrnuferil hans fyrir aðeins örfáum mánuðum síðan.

Guidetti er tvítugur sóknarmaður frá Svíþjóð sem er á mála hjá Englandsmeisturum Manchester City.

Hann var lánaður til Feyenoord á síðasta tímabili þar sem hann skoraði 20 mörk í 23 leikjum. Hann varð markahæsti leikmaður liðsins á tímabilinu, þó svo að hann hafi ekkert spilað eftir miðjan apríl.

Guidetti veiktist illa þegar hann fékk slæma vírussýkingu sem lamaði hægri fót hans. Talið er að hann hafi veikst af því að borða kjúkling sem var illa eldaður.

„Við erum mjög ánægðir með hversu færir læknar eru í Rotterdam. Hefðu þeir ekki brugðist svona skjótt við hefði ég óttast verulega um knattspyrnuferil hans," sagði umboðsmaður Guidetti við hollenska fjölmiðla.

„Honum líður nokkuð vel en það er enn of snemmt að segja hvenær hann muni spila aftur," bætti hann við.

Roberto Mancini, stjóri City, mun vera hrifinn af Guidetti og áhugasamur um að halda honum hjá félaginu. Hann sé því opinn fyrir því að leyfa honum að fara á láni til annars félags í vetur.

„Það eru fimmtán félög sem hafa spurst fyrir um hann en þetta er allt undir City komið. En ég hef trú á að þetta muni allt saman fá farsælan endi."