Hazard lagði upp þrjú í 4-2 sigri Chelsea á Reading

Spánverjinn Fernando Torres opnaði markareikning sinn í ensku úrvalsdeildinni á þessu tímabili og Eden Hazard lagði upp þrjú mörk Chelsea vann 4-2 sigur á nýliðum Reading á Stamford Bridge í kvöld. Reading komst yfir með tveimur mörkum á fjögurra mínútna kafla í fyrri hálfleik en varð á endanum að sætta sig við tap.

Chelsea er með fullt hús á toppi deildarinnar því liðið vann 2-0 sigur á Wigan í fyrstu umferðinni um síðustu helgi. Leiknum í kvöld var flýtt vegna þátttöku Chelsea-liðsins í Ofurbikar UEFA þar sem mætast sigurvegarar í Meistaradeildinni og Evrópudeildinni.

Eden Hazard bjó til þrjú mörk Chelsea í leiknum og hefur því skapað fimm mörk fyrir félaga sína í fyrstu tveimur leikjum sínum í ensku úrvalsdeildinni.

Fernando Torres hélt þarna upp á 150. leikinn sinn í ensku úrvalsdeildinni með marki en hann er nú búinn að skora 73 mörk í þessum 150 leikjum sínum í deild þeirra bestu.

Chelsea byrjaði leikinn vel. Eden Hazard fiskaði sitt annað víti í jafnmörgum leikjum á 19. mínútu og Frank Lampard skoraði örugglega alveg eins og á móti Wigan um síðustu helgi.

Einhverjir hefði búist við að róðurinn yrði þungur fyrir nýliðana í Reading eftir að hafa lent undir svona snemma en raunin varð önnur.

Rússinn Pavel Pogrebnyak jafnaði með frábærum skalla á 25. mínútu eftir fyrirgjöf frá Garath McCleary og aðeins fjórum mínútum síðar skoraði Danny Guthrie beint úr aukaspyrnu.

Petr Cech, markvörður Chelsea, gat lítið gert við fyrra markinu en gerði aftur á móti stór mistök í því síðara þegar skotið úr aukaspyrnunni virtist hættulaust og beint á hann.

Eden Hazard heldur áfram að leggja upp mörk fyrir Chelsea því á 69. mínútu fann hann miðvörðinn Gary Cahill sem lét vaða af 30 metra færi og boltinn fór í markið. Adam Federici, markvörður Reading, átti eins og Cech í fyrri hálfleiknum að gera mun betur.

Fernando Torres kom Chelsea í 3-2 á 81. mínútu með skoti í tómt markið af stuttu færi eftir sendingu frá Ashley Cole. Chelsea-menn sundurspiluðu þarna vörn Reading en það var svolítil rangstöðulykt af markinu.

Eden Hazard sýndi síðan mikla óeigingirni í uppbótartímanum þegar Adam Federici, markvörður Reading, var kominn fram til þess að freista þess að jafna. Chelsea náði boltanum, Hazard keyrði upp allan völlinn og gaf hann síðan á Branislav Ivanovic sem skoraði í tómt markið.