Tottenham ekki hætt að kaupa - Remy næstur á dagskrá

Andre Villas-Boas, stjóri Tottenham er ekki alveg sáttur við leikmannahópinn hjá Tottenham og stjórnarformaðurinn Daniel Levy flýgur til Marseille í dag til þess að reyna að ganga frá kaupum á framherjanum Loic Remy. Félagsskiptaglugginn lokar á miðnætti á föstudag og verða Tottenham-menn því að hafa hraðann á ætli þeir að gera Remy að leikmanni Tottenham fyrir þann tíma.

Loic Remy er 25 ára framherji sem hefur skorað 27 mörk í 60 deildarleikjum með Marseille undanfarin tvö tímabil. Hann hefur vakið athygli úrvalsdeildarliða í Englandi fyrir vaska frammistöðu á þessum tveimur tímabilum með Marseille en áður lék hann með liðum Lyon, Lens og Nice.

Villas-Boas er þegar búinn að ganga frá því að Emmanuel Adebayor spili áfram með liðinu en telur samt að liðið þurfi annan framherja. Fyrir utan Adebayor þá er Jermaine Defoe er eini hreinræktaði framherjinn í Spurs.

Villas-Boas var fyrr í vikunni búinn að kaupa miðjumanninn Moussa Dembele frá Fulham auk þess að selja Luka Modric til Real Madrid. Hugo Lloris, markvörður Lyon, var líka kominn langleiðina á White Hart Lane en það hljóp snurða á þráðinn í samningaviðræðum félagsins við Lloris.