Borgarstjórinn í New York styður Obama

Michael Bloomberg, borgarstjóri í New York, lýsti í gær yfir stuðningi við Barack Obama, forseta Bandaríkjanna í forsetakosningunum sem haldnar verða í næstu viku.

Borgarstjórinn hafði áður sagt að hann myndi hvorki styðja Obama né Mitt Romney mótframbjóðanda hans. En eftir að fellibylurinn Sandy reið yfir austurströnd Bandaríkjanna breyttist staðan. Bloomberg sagði í grein á vef Bloomberg fréttaveitunnar að hann myndi styðja þann frambjóðanda sem tæki loftslagsvísindum alvarlega.

Í greininni segir Bloomberg líka að hann sé ósammála Romney varðandi ýmis félagsleg réttindi, svo sem um réttindi samkynhneigðra og um rétt kvenna til að gangast undir fóstureyðingar. Hann er líka ósammála Romney um löggjöf varðandi skotvopnaeign, en margir Repúblikanar vilja hafa slíka löggjöf sem allra frjálsasta.

Báðir frambjóðendurnir munu hafa falast eftir stuðningi frá borgarstjóranum en hann var lengst af óákveðinn. Honum þykir Obama ekki hafa gengið vel við að fást við efnahagsmálin síðustu fjögur ár en hann telur aftur á móti að sú hugmyndafræði sem Romney aðhyllist sé einfaldlega of ólík sinni.