Villas-Boas rekinn frá Chelsea

Chelsea hefur ákveðið að segja Andre Villas-Boas, knattspyrnustjóra, upp störfum hjá félaginu. Roberto di Matteo tekur við og stýrir liðinu til loka tímabilsins.

Chelsea tapaði í gær fyrir West Brom, 1-0, og hefur nú unnið aðeins einn sigur í síðustu sex leikjum sínum í deildinni. Liðið tapaði þar að auki fyrir Napoli, 3-1, í fyrri leik liðanna í 16-liða úrslitum Meistaradeildar Evrópu.

Chelsea hefur alls unnið aðeins þrjá leiki í síðustu tólf leikjum sínum í ensku úrvalsdeildinni.

Di Matteo hefur verið aðstoðarmaður Villas-Boas sem tók við liðinu í sumar. Hann er á 35. aldursári og var yngsti knattspyrnustjóri ensku úrvalsdeildarinnar.

Roman Abramovich er eigandi Chelsea en hann hefur hingað til ekki verið þekktur fyrir þolinmæði og að gefa knattspyrnustjórum sínum tíma og svigrúm.