Ferguson: Kom ekki á óvart að Villas-Boas var rekinn

Sir Alex Ferguson, stjóri Manchester United, segir að það hafi verið dæmigert fyrir knattspyrnuheiminn í dag að Andre Villas-Boas hafi verið rekinn úr starfi knattspyrnustjóra Chelsea.

Villas-Boas var í dag rekinn frá Chelsea eftir aðeins átta mánuði í starfi en gengi liðsins hefur ekki verið gott að undanförnu. Liðið tapaði í gær fyrir West Brom, 1-0, sem gerði útslagið.

„Fréttirnar komu mér í raun ekki á óvart," sagði Ferguson eftir 3-1 sigur sinna manna á Tottenham í dag. „Það hefur verið mikið fjallað um þetta í fjölmiðlum og úrslitin hafa ekki verið honum í hag. Þetta eru vonbrigði vegna þess að hann er ungur knattspyrnustjóri."

„Ungir menn þurfa tíma og því miður fær maður ekki mikinn tíma í þessum bransa. Þetta eru því í raun nokkuð dapurleg tíðindi."

„Ég vona að honum gangi vel í framtíðinni því hann er efnilegur. Það er ekki hægt að líta framhjá því sem hann gerði hjá Porto og ég vona að hann snúi aftur sem allra fyrst."