Guidetti fær nýjan langtímasamning hjá City

John Guidetti, sænskur sóknarmaður hjá Manchester City, fær samkvæmt enskum fjölmiðlum nýjan langtímasamning við félagið þrátt fyrir að eiga tvö ár eftir af núverandi samningi.

Guidetti er greinilega í miklum metum hjá forráðamönnum City en hann lék sem lánsmaður með Feyenoord í Hollandi í fyrra. Þar skoraði hann 20 mörk í 23 leikjum áður en hann veiktist illa í apríl.

Vegna veikindanna missti hann af undirbúningstímabilinu í sumar og var því ekki lánaður til annars félags í haust. Það er ekki útilokað að hann verði lánaður annað þegar félagaskiptaglugginn opnar í janúar.

Forráðamenn Feyenoord eru sagðir afar áhugasamir um að fá hann til baka og þá eru lið á Ítalíu, Spáni og Þýskalandi sögð hafa augastað á kappanum.