Umboðsmaður Balotelli metur hann á 250 milljónir evra

Umboðsmaður Mario Balotelli telur afar ólíklegt að kappinn muni fara frá Manchester City í sumar þrátt fyrir áhuga stórliða á Ítalíu.

Balotelli sló í gegn með tveimur mörkum í 2-1 sigri Ítalíu á Þýskalandi í undanúrslitum Evrópumótsins sem lauk í gær. Hann náði sér hins vegar ekki á strik í úrslitaleiknum þar sem Ítalía steinlá gegn Spáni, 4-0.

AC Milan hefur áhuga á Balotelli auk þess sem að Massimo Moratti, forseti Inter, hefur lýst yfir áhuga á að fá kappann aftur í raðir félagsins.

Mino Raiola, umboðsmaður Balotelli, segir þó afar ólíklegt að Balotelli muni skipta um félag í sumar. „Ég er 200 prósent viss um að Mario muni ekki snúa aftur til Ítalíu - að minnsta kosti ekki á meðan ég er umboðsmaður hans."

„Ég hef alltaf sagt að Mario gæti orðið einn besti leikmaður heims. Hann er líklega einn sá besti í Evrópu í dag."

„Ég held að það væri erfitt að setja verðmiða á hann miðað við hvernig markaðurinn er í dag. En ef ég ætti að nefna upphæð þá tel ég að 250 milljónir evra (tæpir 40 milljarðar króna) væri nærri lagi."

„En það væri líklega betra að spyrja eiganda Manchester City að því."