Kuyt: Þetta er ástæðan fyrir því að ég kom til Liverpool

Hollendingurinn Dirk Kuyt var í skýjunum með sinn fyrsta titil hjá félaginu. Kuyt skoraði í framlengingu auk þess að nýta sína spyrnu í vítaspyrnukeppninni í dramatískum sigri Liverpool

„Þetta er ástæðan fyrir því að ég kom til Liverpool og að vinna minn fyrsta er stórkostlegt. Vonandi getum við bætt öðrum við í lok tímabils," sagði Kuyt en Liverpool mætir Stoke í enska bikarnum í næstu umferð.

Kuyt byrjaði leikinn á bekknum en lét til sín taka þegar hann kom inn á í framlengingunni.

„Það voru vonbrigði að fá ekki að spila meira en ég varð að gleyma því og gladdist mjög þegar ég skoraði," sagði Kuyt sem kom Liverpool yfir í upphafi seinni hálfleiks framlengingar.

Steven Gerrard, fyrirliði Liverpool, sagði alltaf grimmt að tapa í vítaspyrnukeppni og hrósaði leikmönnum Cardiff.

„Annað liðið verður að tapa. Leikmenn Cardiff voru stórkostlegir í dag," sagði Gerrard.

Það var frændi Steven Gerrard, Anthony Gerrard, sem klúðraði síðustu spyrnu Cardiff í vítakeppninni og tryggði Liverpool sigurinn.