Stjóri Newcastle vill að Van Persie verði refsað

Alan Pardew, stjóri Newcastle, var ekki sáttur með olnbogaskot Robin van Persie í leik Newcastle og Manchester United í ensku úrvalsdeildinni í gær. United vann leikinn 3-0 en atvikið gerðist undir lok leiksins.

Pardew heldur því fram að Robin van Persie hafi gefið Yohan Cabaye olnbogaskot en hollenski framherjinn lenti einnig í leiðindum á móti Newcastle í fyrra þá sem leikmaður Arsenal og við Tim Krul markvörð Newcastle.

„Hann horfði á Yohan og gaf honum síðan olnbogaskot. Ég tel að menn verði að skoða þetta betur," sagði Alan Pardew.

„Við vitum hvað gerðist í fyrra og ég veit ekki hvort Robin hafi látið það mál flækjast fyrir sér eða hvort að hann hafi bara farið óvarlega í þetta skallaeinvígi," sagði Pardew.

„Ég sá þetta ekki sjálfur en hef augljóslega séð þetta aftur í sjónvarpinu og það lítur út fyrir að hann horfi á hann og setji olnbogann fram. Enska sambandið verður að skoða þetta en ekki ég," sagði Pardew.

Það má sjá svipmyndir frá leiknum með því að smella hér fyrir ofan.