Hitzlsperger æfir með Everton

Þjóðverjinn Thomas Hitzlsperger er nú að æfa með Everton til reynslu en þessi þrítugi miðvallarleikmaður er nú án félags.

Hitzlsperger lék með Aston Villa og West Ham á sínum tíma en var síðast á mála hjá Wolfsburg í heimalandinu.

David Moyes, stjóri Everton, mun vera áhugasamur um að styrkja leikmannahópinn vegna meiðsla Darron Gibson en hann sagðist vera ánægður með það sem hann hefur séð á æfingum.

„Það er að vísu langt í að hann geti spilað en við gáfum honum tækifæri til að sýna hvað hann getur og nú er þetta undir honum komið. Við munum meta hann á næstu vikum."

„Hann virðist virkilega góður drengur og ég held að ég hafi aldrei séð til hans nema með bros á vör," sagði Moyes.