Man. City býður Silva gull og græna skóga

Spænski landsliðsmaðurinn David Silva er í samningaviðræðum við Man. City þessa dagana. Félagið vill endilega gera nýjan, langtímasamning við leikmanninn.

City hefur boðið leikmanninum fimm ára samning þar sem hann mun fá 240 þúsund pund í vikulaun.

Þegar er búið að funda þrisvar sinnum og hafa viðræður gengið vel. Viðræðurnar eru sagðar vera á lokastigi.

Forráðamenn City hafa áhyggjur af því að Real Madrid geti stolið leikmanninum og vilja því semja við hann sem allra fyrst.

Núverandi samningur Silva við City rennur út 2014.