Klettamyndanir á botni Eystrasaltsins - ekki geimskip

Fyrirbærið sem hafrannsóknarmenn fundu á botni Eystrasaltsins í maí árið 2011 hefur heillað marga. Sumir halda því fram að aldagamalt geimskip liggi þar á hafsbotni meðan aðrir telja hlutinn vera leynivopn nasista frá seinni heimsstyrjöld. Hluturinn, sem er disklaga, er á stærð við Boeing 747 breiðþotu.

Því miður virðist raunveruleikinn ekki vera jafn spennandi og draumórarnir. Volker Brüchert, jarðfræðingur við háskólann í Stokkhólm, hefur rannsakað sýni sem hópur vísindamanna tók af fyrirbærinu.

Að mati Brücherts er augljóslega um klettamyndun að ræða sem mótuð var af skriðjöklum fyrir þúsundum ára.

„Það sem vísindamennirnir hafa horft framhjá er sú staðreynd að sýnin eru nær öll granít, gneiss eða sandsteinn," segir Brüchert og bætir við: „Þetta er nákvæmlega það sem maður á von á finna þegar sýni frá Eystrasaltinu eru skoðuð."