Sinclair á leiðinni í læknisskoðun hjá Manchester City

Scott Sinclair verður væntanlega orðinn leikmaður Manchester City seinna í dag eftir að City og Swansea sættust á kaupverð upp á 6,2 milljónir punda. Þetta kemur fram á BBC.

Þessi 23 ára vængmaður hefur samþykkt fjögurra ára samning við ensku meistarana en Sinclair var ekki tilbúinn að framlengja samning sinn við Swansea og því ákvað Michael Laudrup og forráðamenn Swansea að selja hann.

Swansea vildi í fyrstu fá meira fyrir Sinclair en nú er eins og félagið hafi ákveðið að samþykkja tilboð Manchester City. Málið hefur dregist á langinn en nú virðist loksins sjá fyrir endann á því.

Swansea hefur strax fundið eftirmann Sinclair því félagið ætlar að kaupa vængmanninn Pablo Hernandez frá spænska liðinu Valencia fyrir 5,5 milljónir punda.