QPR og Real Madrid komast að samkomulagi um Esteban Granero

Allt bendir til þess að miðjumaðurinn Esteban Granero sé á leið til QPR í ensku úrvalsdeildinni. Lundúnarfélagið og Real Madrid hafa komist að samkomulagi um félagaskipti kappans.

Frá þessu er greint á heimasíðu enska félagsins. Granero á enn eftir að gangast undir læknisskoðun hjá QPR auk þess að semja um kaup og kjör.

Granero hefur ekki átt fast sæti í liði Real Madrid frá því hann kom til félagsins frá Getafe árið 2009. Hann verður fimmti leikmaðurinn sem Mark Hughes fær til liðs við liðið í sumar.

Brasilíski markvörðuinn Julio Cesar er nýkominn frá Inter en auk þeirra eru Rob Green, Samba Diakite, David Hoilett og Ji-Sung Park gengnir til liðs við félagið.