Agger íhugar að áfrýja rauða spjaldinu

Danski varnarmaðurinn Daniel Agger hjá Liverpool er ekki sáttur við rauða spjaldið sem hann fékk í leiknum gegn WBA um helgina og íhugar að áfrýja því.

Agger fékk beint rautt spjald í leiknum sem Liverpool tapaði, 3-0, en það var stærsti skellur Liverpool í opnunarleik í rúm 70 ár.

Agger segist ekki hafa komið við Shane Long, leikmann WBA, en rauða spjaldið þýðir að hann missir af næsta leik gegn Man. City.

"Ég er búinn að skoða þetta og það sést að ég kem ekki við hann. Dómarar eru bara mannlegir og gera mistök eins og aðrir. Ég var óheppinn að lenda í dómaramistökum. Það er pirrandi en hluti af leiknum," sagði Agger.