Giroud biður um þolinmæði

Frumraun franska framherjans Olivier Giroud hjá Arsenal var ekki sú besta en hann fær það erfiða hlutverk að reyna að fylla skarðið sem Robin van Persie skilur eftir hjá félaginu.

Giroud kom af bekknum í leiknum, sem endaði með markalausu jafntefli, og klúðraði besta færi leiksins.

"Ég hefði átt að klára þetta færi en stjórinn sagði mér að hafa ekki áhyggjur af þessu. Það hefði verið draumabyrjun að vinna leikinn en ég skoraði heldur ekki í fyrsta leik mínum með Montpellier þannig að ég hef ekki áhyggjur," sagði framherjinn sem skoraði 21 mark í frönsku deildinni síðasta vetur.

"Van Persie var frábær hér í fyrra en hann þurfti sinn tíma. Ég bið því fólk um að sýna mér smá þolinmæði. Ég er ekki að reyna að fá fólk til þess að gleyma Robin heldur vil ég bara standa mig þó svo ég viti að félagið vanti mann sem byrjar strax að skora."