Tíu ár síðan að Rooney spilaði fyrsta leikinn í ensku úrvalsdeildinni

Wayne Rooney, framherji Manchester United, er aðeins 26 ára gamall en það eru engu að síður tíu ár síðan að hann spilaði sinn fyrsta leik með Everton. Rooney heldur upp á áratug í bestu deild í heimi með því að heimsækja sitt gamla félag á Goodison Park í kvöld en Everton og Manchester United spila þá lokaleik fyrstu umferðarinnar.

Rooney lék sinn fyrsta leik með Everton á móti Tottenham á Goodison Park 17. agúst 2002 en liðin gerðu þá 2-2 jafntefli. Tomasz Radzinski, Wayne Rooney og Kevin Campbell voru þá saman í þriggja manna framlínu Everton og Rooney lagði upp fyrsta mark leiksins fyrir Mark Pembridge,

Wayne Rooney lék með Everton í tvö tímabil og skoraði 15 mörk í 67 leikjum áður en hann var seldur til Manchester United í ágúst 2004. Hann hefur skorað 129 mörk í 251 úrvalsdeildarleikjum í búningi United.

„Það er frábært að vera búinn að spila tíu ár í ensku úrvalsdeildinni. Þetta er spennandi deild og mér finnst ekki langt síðan að ég lék minn fyrsta leik. Mér finnst ég líka ennþá vera ungur maður og vonandi næ ég að spila í önnur tíu ár til viðbótar," sagði Wayne Rooney.

Wayne Rooney fékk góða "gjöf" í tilefni afmælisins þegar Manchester United keypti hollenska framherjann Robin Van Persie en þeir leik væntanlega í fyrsta sinn saman í leiknum á Goodison Park í kvöld.