Hazard getur orðið listamaður eins og Zola

Roberto di Matteo, stjóri Chelsea, segist sjá margt sameiginlegt með Eden Hazard og Gianfranco Zola sem var stjarna hjá Chelsea á árum áður.

Hinn 21 árs gamli Hazard gekk í raðir Chelsea í sumar eftir mikið japl, jaml og fuður. Kostaði hann litlar 32 milljónir punda og miðað við frammistöðuna um síðustu helgi stendur hann undir öllu skruminu.

"Gianfranco var einstakur hæfileikamaður. Eiginlega listamaður. Eden gæti líka orðið listamaður á vellinum eins og Zola," sagði Di Matteo.

"Það er kannski fullsnemmt að spá því samt en byrjunin lofar heldur betur góðu. Hún gefur honum sjálfstraust en strákurinn er rosalega hæfileikaríkur. Við verðum að bíða og sjá hvernig hann verður er hann verður að manni."