Welbeck fékk nýjan samning

Danny Welbeck hefur skrifað undir nýjan fjögurra ára samning við Manchester United. Þessi 21 árs gamli sóknarmaður hefur verið á mála hjá United allan sinn feril.

Welbeck hefur skorað sautján mörk í 64 leikjum með félaginu og var valinn í enska landsliðið fyrir EM í sumar.

Hann hefur verið hjá United síðan hann var átta ára gamall og lék sinn fyrsta leik með liðinu árið 2009. Hann hefur leikið sem lánsmaður með bæði Preston North End og Sunderland og er nú á sínu öðru tímabili sem fastamaður í liði United.

„Það eina sem ég hef viljað gera allt mitt líf er að spila knattspyrnu með Manchester United - félaginu sem ég hef alltaf stutt," sagði hann í viðtali á heimasíðu United.

Mikil samkeppni er á milli framherja United um sæti í byrjunarliðinu eftir komu Robin van Persie fyrr í mánuðinum. Fyrir eru auk Welbeck þeir Wayne Rooney, Javier Hernandez, Dimitar Berbatov og Federico Macheda hjá liðinu.