Kobe nálægt því að fara til Dallas árið 2007

Mark Cuban, eigandi Dallas Mavericks, hefur greint frá því að Kobe Bryant hafi verið nálægt því að ganga til liðs við félagið fyrir fimm árum síðan.

Cuban sagði að Kobe hefði þá verið óánægður með eigendur félagsins og að þeir hefðu ekki styrkt liðið nægilega vel eftir brotthvarf Shaquille O'Neal sem fór til Miami árið 2004.

Cuban var á sama tíma að taka þátt í raunveruleikaþættinum Dancing with the Stars og að hann hefði mikið verið í símanum á milli æfinga.

„Ég var mikið að tala við umboðsmann Kobe því Kobe vildi fara," sagði Cuban.

„Á einum tímapunkti hélt ég að þetta hefði tekist. Ég hringdi í eiganda Lakers en þá hafði Mitch Kupchak (framkvæmdarstjóri Lakers) talið Kobe hughvarf."

Cuban tók þó fram að það hefði ekki komið til greina að skipta á Dirk Nowitzky fyrir Kobe eða nokkurn annan leikmann.