McDermott: Línuvörðurinn verður svekktur út í sjálfan sig

Brian McDermott, stjóri Reading, var svekktur eftir 2-4 tap á móti Chelsea á Brúnni í ensku úrvalsdeildinni í kvöld. Reading komst yfir í 2-1 en fékk síðan á sig þrjú mörk í seinni hálfleik, þar af eitt rangstöðumark og lokamarkið þegar allt liðið var komið fram til að freista þess að jafna.

„Þetta er synd og ég er mjög vonsvikinn fyrir hönd leikmannanna. Ég er afar svekktur yfir því að línuvörðurinn skyldi gera svona mistök í þriðja markinu," sagði Brian McDermott við BBC en Fernando Torres leit út fyrir að vera rangstæður þegar hann kom Chelsea yfir í 3-2.

„Ég talaði við línuvörðinn og hann sagðist ætla að skoða þetta. Hann er augljóslega meter inn fyrir og þetta er greinileg rangstaða. Ég er viss um að línuvörðurinn verður svekktur út í sjálfan sig," sagði McDermott.

„Við töldum að það eitthvað í boði fyrir okkur í stöðunni 2-2 og reyndum að skora annað mark. Mér fannst við ekki eiga skilið að tapa þessum leik," sagði McDermott.

„Þetta var frábær leikur. Við komum í heimsókn til Evrópumeistaranna og buðum upp á flotta frammistöðu. Þetta sýnir að við eigum skilið að vera í þessari deild," sagði McDermott.

„Við erum að reyna að spila eins góðan fótbolta og við getum. Ég sagði sjálfum mér það þegar ég tók við þessu starfi að ég ætlaði að að reyna að vinna alla leiki," sagði McDermott.