Di Matteo: Mjög skemmtilegur leikur fyrir áhorfendur

Roberto Di Matteo er búinn að stýra Cheleea til sigurs í tveimur fyrstu leikjum sínum í ensku úrvalsdeildinni en lið hans lenti þó í kröppum dansi í 4-2 sigri á nýliðum Reading í kvöld.

„Þetta var mjög skemmtilegur leikur fyrir áhorfendur. Við byrjuðum vel en við misstum taktinn þegar þeir jöfnuðu leikinn," sagði Roberto Di Matteo en Reading skoraði tvö mörk með fjögurra mínútna millibili og komst yfir í 2-1.

„Við pressuðum þá í seinni hálfeik og náðum sem betur fer að jafna snemma sem gaf okkur aukaorku. Ég hef ekki séð endursýninguna af markinu hans Torres en ég leit á línuvörðinn og hann dæmdi markið strax gilt," sagði Di Matteo en Fernando Torres kom Chelsea í 3-2 með rangstöðumarki.

„Ég er mjög ánægður með hópinn. Við erum með gott lið og sýndum það. Ég verð samt að hrósa liði Reading því lögðu mikið á sig í kvöld," sagði Roberto Di Matteo.