Suarez byrjar með hreint borð

Luis Suarez, framherji Liverpool, segist vera hættur að hugsa um öll lætin sem urðu á síðustu leiktíð. Hann segist hafa lagt þau til hliðar og segist ætla að byrja með hreint borð í vetur.

"Við erum atvinnumenn og spilum fótbolta. Tevez lenti líka í vandræðum. Hann er samt þroskaður og vann úr sínum málum," sagði Suarez sem er búinn að skrifa undir nýjan samning en margir héldu að hann yrði seldur frá Liverpool.

"Það voru félög sem vildu kaupa mig en ég vildi alltaf vera áfram hjá Liverpool. Stjórinn er líka ánægður með mig og það gaf mér sjálfstraust. Félagið treystir á mig og það sem gerðist í fortíðinni skiptir ekki máli. Það er búið."