Bruce Springsteen kennt um frestunina í Sunderland

Þrátt fyrir miklar rigningar á Englandi í gær varð aðeins að fresta einum leik í úrvalsdeildinni. Það var í Sunderland og nú vilja menn kenna Bruce Springsteen og Coldplay um málið.

Sunderland hefur verið að drýgja tekjurnar með því að halda tónleika á vellinum í sumar. Þar af leiðandi var ekki hægt að leggja nýtt gras fyrr en seint í sumar.

Bruce Springsteen, Coldplay og Red Hot Chilli Peppers voru á meðal þeirra sem tróðu upp á Stadium of light í sumar.

"Þetta kom mér mikið á óvart. Þetta er nýr völlur og það er augljóslega ekki allt í lagi. Það er afar óvenjulegt að það þurfi að fresta leik í ágúst. Þessum leik hefði aldrei verið frestað í Reading. Það leynir sér ekki að það er eitthvað að þessum velli," sagði Brian McDermott, stjóri Reading.