Ný regla hjá Sir Alex: 23 ára og yngri mega ekki eignast sportbíla

Það standa ekki allir leikmenn Manchester United við sama borð þegar kemur að því að þiggja gjafir frá styrktaraðilum félagsins. Enska úrvalsdeildarliðið gerði nýverið samning við bílarisann Chevrolet en samningurinn mun taka gildi eftir tvö ár.

Chevrolet ætlaði að fagna þessum nýja samningi með því að bjóða öllum leikmönnum Manchester United nýjan bíl að eigin vali en stjórinn Sir Alex Ferguson var fljótur að setja nýjar reglur fyrir sína leikmenn.

Ryan Giggs og aðrir eldri leikmenn liðsins hafa leyfi til að velja sér hraðskreiðustu sportbílana í flota Chevrolet en þeir sem eru ekki orðnir 23 ára gamlir þurfa að bera val sitt undir stjórann. Giggs er þekktur fyrir áhuga sinn á sportbílum og mun nær örugglega velja kraftmestu Corvettuna.

Sir Alex Ferguson ætlar að gera sitt í að passa upp á að ungir leikmenn sínir missi ekki fótanna og verði freistingum að bráð en ljúfa lífið hefur hindrað margan ungan fótboltamanninn að þroskast og bæta sig sem leikmann og það veit hinn reynslumikli stjóri manna best.

Danny Welbeck, Phil Jones, Chris Smalling og Rafael eru allir fastamenn í liði Manchester United liðsins en mega ekki fá sportbíl frá Chevrolet og þurfa að bera val sitt undir stjórann.