Mikið að gera hjá Brendan Rodgers fram á föstudag

Liverpool Echo segir frá því í morgun að Fulham-maðurinn Clint Dempsey sé enn efstur á óskalistanum hjá Brendan Rodgers, stjóra Liverpool en félagsskiptaglugginn lokar á miðnætti á föstudag og því er ekki langur tími til stefnu til að styrkja liðið. Það verður væntanlega mikið að gera hjá Rodgers á næstu dögum.

Clint Dempsey hefur ekki spilað með Fulham í fyrstu leikjum tímabilsins og hefur tjáð Martin Jol, stjóra Fulham, að hann vilji fara frá Craven Cottage. Liverpool þarf hinsvegar að greiða um átta milljónir punda ætli félagið að fá leikmanninn á Anfield.

Charlie Adam komst ekki í leikmannahóp Liverpool fyrir leikinn á móti Manchester City um síðustu helgi og er til sölu. Liverpool eyddi 8 milljónum punda í hann fyrir aðeins ári síðan þegar félagið keypti hann frá Blackpool.

Jay Spearing verður lánaður til Bolton allt þetta tímabil og þá er líklegt að Joe Cole sé á leiðinni "heim" til West Ham. Það sem tefur þær viðræður er að Cole er meiddur og ennfremur að hann fái 100 þúsund pund í vikulaun.