Swansea hafnaði tilboði Manchester City í Sinclair

Swansea City vill fá meira en 6,2 milljónir punda fyrir Scott Sinclair og hefur því hafnað tilboði frá Englandsmeisturum Manchester City. Fyrstu fréttir voru að Swansea hefði tekið tilboðinu en það var ekki rétt.

Hinn 23 ára gamli Scott Sinclair var ekki í leikmannahópi Swansea City um helgina og hefur gefið það út að hann ætli ekki að skrifa undir nýjan samning við félagið.

Michael Laudrup, stjóri Swansea, hefur ekki þurft að hafa miklar áhyggjur af fjarveru Scott Sinclair enda Swansea búið að vinna tvo leiki með markatölunni 8-0.

Huw Jenkins, stjórnarformaður Swansea City, sagði enskum fjölmiðlum í dag að salan væri ekki í höfn og notaði tækifærið til að reka á eftir risunum í Manchester City.

„Maður hefði nú haldið að ef þeir hefðu virkilegan áhuga á Scott Sinclair þá hefðu þeir staðið sig betur í þessu máli. Það er nú bara þeirra mál," sagði Huw Jenkins við BBC.

Michael Laudrup er þrátt fyrir góða byrjun í ensku úrvaldsdeildinni ekki hættur að styrkja liðið og er Daninn að reyna að kaupa þrjá leikmenn til viðbótar áður en félagsskiptaglugginn lokar á föstudaginn.