Sahin: Ég ætla að hjálpa Liverpool að ná Meistaradeildarsæti

Nuri Sahin, nýr leikmaður Liverpool, svaraði spurningum blaðamanna í dag en hann kemur til Anfield á láni frá spænska liðinu Real Madrid. Nuri Sahin var allt í öllu þegar Dortmund vann þýsku deildina 2010-11 en spilaði lítið á sínu fyrsta tímabili með Real Madrid.

„Ég er mjög spenntur að fá að spila á þessu tímabili og ég mun gera allt mitt til þess að liðið nái einu af fjórum efstu sætunum. Ég ætla að hjálpa Liverpool að ná Meistaradeildarsæti," sagði Nuri Sahin. Kicker valdi hann besta leikmann þýsku úrvalsdeildarinnar 2010-11.

„Ég spilaði ekki marga leiki á síðustu leiktíð og því var mikilvægt fyrir mig að komast í topplið og fá að spila. Liverpool var besta liðið í boði fyrir mig," sagði Nuri Sahin en Xabi Alonso, fyrrum leikmaður Liverpool, talaði vel um sitt gamla félag.

„Xabi sagði bara góða hluti um félagið. Hann spilaði í mörg ár fyrir Liverpool og elskar félagið ennþá," sagði Sahin.

„Það var gott að sjá leikinn á móti Manchester City og ég sá þar að leikstíll liðsins er mjög góður. Ég er að sjá það með berum augum sem menn voru búnir að segja mér. Liverpool er stór klúbbur með mikla sögu og ég tel að ég hafi tekið hárrétta ákvörðun," sagði Sahin en hann var með 6 mörk og 8 stoðsendingar af miðjunni í 30 leikjum með Þýskalandsmeisturum Dortmund 2010-11.